Ўзбекистон Республикаси Президентининг 2021 йил 4 мартдаги ПФ–6181-сон “2021-2025 йилларда фуқаролик жамиятини ривожлантириш концепциясини тасдиқлаш тўғрисида”ги Фармони ижросини таъминлаш мақсадида Ўзбекистон Республикаси Адлия вазирлиги ва Нодавлат нотижорат ташкилотлари миллий ассоциацияси томонидан Нодавлат нотижорат ташкилотлари фаолиятининг очиқлик (шаффофлик) стандарти ишлаб чиқилди.

Мазкур стандарт нодавлат нотижорат ташкилотлари томонидан ўз вазифа ва мақсадларини амалга ошириш билан боғлиқ жараёнда ошкораликни таъминлашга хизмат қилиб, фаолиятнинг очиқлиги, қонунийлиги, коррупциядан ҳолилиги, ҳисобдорлиги, шунингдек, иш услуби ва бошқарувнинг ишончлилиги ҳамда самарадорлигини таъминлашга қаратилган комплекс чораларни ўз ичига олади.

Стандартни жорий этиш жараёнида www.e-ngo.uz сайти нодавлат нотижорат ташкилотларининг фаолиятига оид маълумотларни, жумладан, мол-мулки ва пул маблағларидан фойдаланиш, молиялаштириш манбалари, уларнинг уставларида кўрсатилган йўналишлар бўйича фаолияти натижалари, хусусан, ўтказилган тадбирлар тўғрисидаги ва бошқа ахборотни электрон тартибда қабул қилиш ва умумлаштириш вазифасини бажаради.

Жойлаштирилган маълумотлар ва жамоатчилик томонидан берилган баҳолар асосида ҳар йил якунлари бўйича нодавлат нотижорат ташкилотларининг очиқлик индекси аниқланади. Бунда асосий кўрсаткичлар реал вақт режимида умумлаштириб борилади ва барчанинг танишиши учун имконият яратилади.

Очиқлик индексининг якуний натижасини аниқлашда давлат ва нодавлат ташкилотлари, хусусан жамоатчилик иштироки таъминланади.

Очиқлик индекси натижаси бўйича “энг шаффоф нодавлат нотижорат ташкилотлари топ-20” ва “энг фаол нодавлат нотижорат ташкилотлари топ-20” рўйхатлари шакллантирилади.

Шаффофлик стандартини жорий этган нодавлат нотижорат ташкилотларини белгиланган тартибда рағбатлантириш чоралари кўрилади.

Хусусан, амалга оширилган ижобий ишлари (уларнинг фаолияти) жамоатчилик ўртасида оммалаштирилади;

ижтимоий шериклик доирасида давлат грантлари ва ижтимоий буюртмалар олишга тавсиялар (йўлланмалар) берилади;

моддий-техник базани (оргтехника, компьютер, бошқа техник воситалар, бино билан таъминлаш ҳамда бошқалар) мустаҳкамлашга белгиланган тартибда кўмак берилади;

давлат органлари ва ҳалқаро ташкилотлар билан ҳамкорлик алоқаларини ривожлантириш чоралари кўрилади.

Юқоридагиларга кўра, очиқлик стандарти бўйича таклиф ва мулоҳаларингизни a.madaminov@adliya.uz электрон манзилига юборишингиз сўралади.