Ўзб Рус
Охирги янгиланиш : 12.11.2018



08:27:39 (GMT +5), Сш, 13 ноя 2018

Адлия вазирлиги томонидан ўтказилган “Энг яхши ҳуқуқ тарғиботчиси” танлови ғолиблари тақдирланди

Аҳамият беринг

Адлия вазирлиги томонидан ўтказилган “Энг яхши ҳуқуқ тарғиботчиси” танлови ғолиблари тақдирланди

Хабарингиз бор, бундан икки ой аввал  Адлия вазирлиги томонидан “Энг яхши ҳуқуқ тарғиботчиси” танлови эълон қилинган эди. Ушбу танлов ғолиблари ўнта номинация бўйича мустақиллик байрами арафасида аниқланди. Жорий йилнинг 12 сентябрь куни ана шу ғолибларни тақдирлаш маросими бўлиб ўтди.


Рўйхатга қайтиш Чоп этиш

Муаллиф : Адлия вазирлиги Жамоатчилик билан алоқалар бўлими

 Хабарингиз бор, бундан икки ой аввал  Адлия вазирлиги томонидан “Энг яхши ҳуқуқ тарғиботчиси” танлови эълон қилинган эди. Ушбу танлов ғолиблари ўнта номинация бўйича мустақиллик байрами арафасида аниқланди. Жорий йилнинг 12 сентябрь куни ана шу ғолибларни тақдирлаш маросими бўлиб ўтди.

 Маълумот ўрнида айтиш жоизки, мазкур танлов Адлия вазирлиги томонидан Ўзбекистон миллий телерадиокомпанияси, “Туронбанк” акциядорлик тижорат банки ҳамда Ўзбекистон электрон оммавий ахборот воситалари миллий ассоциацияси билан ҳамкорликда ташкил этилди. Унга икки ой давомида 170 дан ортиқ материал келиб тушди. Танлов низомига мувофиқ ҳакамлар ҳайъати ушбу материалларни ўрганиб чиқиб, яширин овоз бериш йўли билан ғолибларни аниқлади.

 Ўзбекистон Республикаси Адлия вазирлиги аҳолининг ҳуқуқий онгини янада ривожлантириш, ҳуқуқий маданиятни ўстириш орқали қонун устуворлигини таъминлаш йўлида тизимли равишда иш олиб боришда давом этади.

“Энг яхши ҳуқуқ тарғиботчиси” танлови ҳам айнан мана шу тадбирлар доирасида ташкил этилди.

Танлов ғолиблари билан танишинг:

“Ҳуқуқий тарғиботдаги фидойилиги учун” номинацияси бўйича: Муҳиддинова Феруза Абдурашидовна – Тошкент давлат юридик университети профессори. Республика миқёсидаги ҳуқуқий тарғибот гуруҳлари аъзоси. 100 га яқин илмий ишлар: монография, рисола ва илмий мақолалар муаллифи.

“Ҳуқуқий маданиятни тарғиб қилувчи энг яхши мутахассис” номинацияси бўйича:

Худойбердиев Хушнудбек Ғайратович – Ўзбекистон касаба уюшмалари федерацияси кенгаши аппаратининг юридик бўлими мудири ўринбосари. "Telegram"да “Xushnudbek.uz” номли канални юритади.

“Ҳуқуқий маданиятни тарғиб қилувчи энг яхши журналист” номинацияси бўйича:

Эргашева Дилфуза Рустамовна – “Инсон ва қонун” газетаси адабий муҳаррири, журналист, блогер. Ҳуқуқий тарғибот йўналишидаги қатор материаллари матбуотда ва интернет саҳифаларида эълон қилинган. 

“Ҳуқуқий маданиятни тарғиб қилувчи энг яхши ОАВ” номинацияси бўйича:

“Ўзбекистон 24” телеканали – ҳуқуқий тарғибот, хусусан қабул қилинаётган қонун ҳужжатларининг мазмун-моҳияти ва аҳамиятини аҳолига етказишда энг фаол телеканал.

“Ҳуқуқий маданиятни тарғиб қилувчи энг яхши блогер” номинацияси бўйича:

Калонов Баҳром Қосимжонович – таниқли карикатурачи-рассом. Унинг биргина "#бизкоррупциягақаршимиз” хештэги остидаги туркум карикатуралари "Telegram", "Facebook" ва "Instagram" ижтимоий тармоғида миллион мартадан ортиқ кўрилган. Ижтимоий тармоқларда машҳур бўлган “Раис бува” муаллифи.

“Ҳуқуқий маданиятни тарғиб қилувчи энг яхши сайт” номинацияси бўйича:

“Xabar.uz” портали – ахборот-таҳлилий портал. Мазкур сайтда фуқароларнинг ҳуқуқий ва ижтимоий фаоллигини янада юксалтириш, ҳуқуқий саводхонлигини ошириш бўйича мунтазам равишда ҳуқуқий соҳадаги ахборот-таҳлилий материаллар эълон қилинган.

“Ҳуқуқий тарғиботдаги энг яхши инновацион лойиҳа” номинацияси бўйича:

Ғафуров Умид Илҳомович – ижтимоий тармоқларда “Troll.uz” номи билан машҳур блогер. Ижтимоий тармоқлар орқали “#бизкоррупциягақаршимиз” хештэги остида “Коррупцияга қаршимиз деб туриб...” ва “Бир гап билан таълимдаги коррупция...” номли серияли постлари кенг оммалашди.

“Маҳаллада ҳуқуқий маданиятни юксалтиришдаги фаоллиги учун” номинацияси бўйича:

Иброҳимов Фарҳод Баҳодирович – жиноят ишлари бўйича Қорақалпоғистон Республикаси судининг катта мутахассиси.

“Ҳуқуқий тарғиботдаги энг яқин ҳамкор” номинацияси бўйича:

“Uzreport” телеканали – ҳуқуқий тарғибот тадбирларини, хусусан “Адлия ахбороти” номли брифингни энг фаол ёритувчи ҳамкор телеканал.

“Энг ёш ҳуқуқ тарғиботчиси” номинацияси бўйича:

Рубцов Юрий Александрович – Фарғона вилояти юридик коллежи битирувчиси (18 ёш). Ҳуқуқий тарғиботда фаол, хусусан инфографикалар яратишда юксак маҳоратга эга.

Ғолибларнинг ҳар бирига махсус статуэтка, кўкрак нишони, диплом ва қимматбаҳо совғалар берилди.